කොරෝනා ආසාදිතයින් බවට සැක 222 ක්

0
381

මෙරට තුළ කොරෝනා වෛරසය ආසාදනය වූ පුද්ගලයින් ගණන 86 දෙනෙකු දක්වා ඉහළ ගොස් ඇති බව සෞඛ්‍ය අමාත්‍යාංශය පවසයි.

අතරින් දෙදෙනෙකු අංගොඩ ජාතික බෝවන රෝග විද්‍යායතනයේ දැඩි සත්කාර ඒකකයේ ප්‍රතිකාර ලබයි.

කොරෝනා වෛරසය ආසාදිත බවට සැකපිට පුද්ගලයින් 222 දිවයිනේ රෝහල් 18ක ප්‍රතිකාර ලබන බව වසංගත රෝග විද්‍යා අංශය පෙන්වා දෙයි.

අලුතින් ආසාදිතයින් 05 දෙනෙකු හඳුනා ගැනීමත් සමඟ මෙතෙක් හඳුනාගත් සමස්ත ආසාදිතයින් ගණන 86ක්.

වෛරසය ව්‍යාප්තිය වැළැක්වීම සඳහා දිවයින පුරා නිරෝධායන මධ්‍යස්ථාන 45ක පුද්ගලයන් 3506 දෙනෙකු නිරෝධායන ක්‍රියාවලිය සඳහා යොමුකර තිබේ.

දඹදිව වන්දනාවේ ගොස් සිට පසුගිය දෙදින තුළ මෙරටට පැමිණි පුද්ගලයන් 444 දෙනෙකු ද ඊට ඇතුළත්.

විදේශගතව සිට මේ මස පළමු වැනිදා සිට 15 වන දින දක්වා මෙරටට පැමිණි පුද්ගලයන් 15,000ක පමණ සංඛ්‍යාවක් සිය තොරතුරු ලබාදී ලියාපදිංචි වී තිබේ.

මෙතෙක් පොලීසියට විස්තර ලබා දී නිරෝධායන ක්‍රියාවලියට සම්බන්ධ නොවූ තැනැත්තන් සිටීනම් වහාම පොලීසියේ ලියාපදිංචි වන ලෙස යුධ හමුදාපති ලුතිනන් ජෙනරාල් ශවේන්ද්‍ර සිල්වා මහතා ඉල්ලිමක් කරයි.

සෞඛ්‍ය අංශ, බුද්ධි අංශ, යුද හමුදාව, පොලිසිය සහ මහජන සෞඛ්‍ය පරික්ෂකයින් විසින් හඳුනා ගත් දස දහසක පමණ පිරිසක් ස්වයං නිරෝධායන ක්‍රියාවලියට අනුගත කිරීමට උපදෙස් ලබාදී තිබේ.

මේ අතර මහියංගණය ප්‍රදේශයේදී පුද්ගලයෙකුට දින 14ක කාලයක් ස්වයං නිරෝධායනයට යොමු වන්නැයි මහජන සෞඛ්‍ය පරීක්ෂකවරුන් විසින් උපදෙස් ලබාදීමත් සමඟ ඔහු එය ප්‍රතික්ෂේප කළේය.

මෙම පුද්ගලයා කොළඹ මරදාන ප්‍රදේශයේ පදිංචි අයෙකු වන අතර සිය හිතවතෙකු මුණ ගැසීම සඳහා මහියංගණයට පැමිණ ඇති බවට ප්‍රකාශ කර තිබේ.

ආසාදිත බවට සැකකෙරෙන පුද්ගලයන්ට සහ ආසාදිතයන්ට ප්‍රතිකාර කිරීම සඳහා දිවයින පුරා රෝහල් 30ක් සූදානම් කර තිබේ.

ඒ අතරට වැලිසර ශ්වසන රෝග පිළිබඳ ජාතික රෝහලේ අංක 11 සහ 12 යන වාට්ටු සංකීර්ණ සියලු පහසුකම් සහිතව නවීකරණය කිරීම පැය 24 ක් වැනි කෙටි කාලයකින් සිදු කිරීමට ශ්‍රී ලංකා ගුවන් හමුදාව සමත් විය.

මෙම වාට්ටු සංකීර්ණයේ පුද්ගලයින් 51 දෙනෙකු නේවාසික නිරෝධායනය කිරීමේ පහසුකම් සලසා දී තිබේ.

මීට අමතරව ඉරණවිල පිහිටි වොයිස් ඔෆ් අමෙරිකා ආයතනයට අයත් ගොඩනැගිලිද කොරෝනා රෝගීන්ට ප්‍රතිකාර කිරීම සඳහා යුද හමුදාවේ මූලිකත්වයෙන් පිළිසකර කටයුතු සිදු කෙරෙයි.

හෝමාගම මූලික රෝහල නව කොරෝනා වෛරසය ආසාදිත රෝගින්ට ප්‍රතිකාර කිරිමේ විශේෂ රෝහලක් ලෙස සංවර්ධනය කෙරුණි.

ඒ අනූව එම රෝහල විෂබීජහරණය කිරීමටද කටයුතු කළේය.

LEAVE A REPLY

Please enter your comment!
Please enter your name here